DOMINIQUE VERSTER
*Vertaal deur Dominique Fuchs
Patogene in algemene areas soos biblioteke en badkamers ontlok gereeld kommer onder die publiek. Dit is veral die geval tydens die eksamenseisoen wanneer honderde Maties in die bib saamdrom en hulle mikrobakterie-kolonies onder een dak integreer.
Die dodelike kombinasie van die swak ondergrondse ventiliasie, die dig gepakte boeke en die hordes studente wat in die biblioteek bymekaarkom gedurende hierdie tydperk is die definisie van ’n patogeniese speelparkie. Volgens ’n reeks studies wat deur Karbowska-Berent et al. in 2011 gedoen is, is boeke wat styf teen mekaar gepak word ’n ideale ruimte vir kieme om te floreer. Die sellulose in die papier en die proteïene in die stof wat die boeke bind, is die perfekte ruimte vir mikrobakterieë om te groei en siektes te versprei. Die dig gepakte boeke en die rakke in die biblioteek kan die vloei van lug belemmer. Dit maak dit moontlik vir mikro-organismes om in die lug te sedimenteer en stof te vorm, wat gevolglik allergieë kan vererger.
Die swak higiëne in biblioteke word geïllustreer deur die artikel, “Fifty Shades of Grey Goes Viral”, wat in 2013 geskryf is. Dit het bewys dat biblioteekboeke wat gereeld uitgeneem word met die herpes-virus besmet is. Gelukkig kan studente die aanslag van patogene afweer deur die volgende raad te volg. Was jou hande gereeld gedurende studiesessies of gebruik handsaniteerders. Volgens Karbowska-Berent et al. se studie moet studente dit vermy om hul skryfbehoeftes te kou of hul vingers te lek as hul bladsye omblaai.
Meeste studente blyk om bekommerd te wees oor die biblioteek se toilette en oor die toestand waarin dit agtergelaat word deur ander studente. Volgens ’n studie wat in 2011 onderneem is, behoort die toiletsitplekke van publieke fasiliteite nie studente se grootste bekommernis te wees nie.
Die studie het bevind dat wanneer ’n toilet met ’n oop deksel gespoel word, mikrobes in die waterspatsels vinnig oor ’n wye area versprei. Dit gekombineer met die feit dat nie alle individue altyd onthou om hul hande te was na ’n uitstappie badkamer toe nie, is ’n groot bron van kommer.
Weens hierdie onhigiëniese praktyke, is deurhandvatsels en krane meer met kieme besmet as toilette. Vermy dit om aan deurhandvatsels en krane te vat deur liewers met jou moue daaraan te raak. Was jou hande en naels deeglik vir ten minste 20 sekondes.
